Ն. Խաչատրյանի խոսքերով` բացի բաց դասերից, դպրոցներում անցկացվում են համացանցի անվտանգ և արդյունավետ օգտագործմանը նվիրված ծնողական ժողովներ:

«Հավատարիմ մնալով համաեվրոպական «Միասին ստեղծենք ավելի ապահով համացանց» ուղերձին այս տարվանից ծրագրում ներառվել է նաև կրթական բաղադրիչը, որի շրջանակներում նախատեսվում է ստեղծել կրթական նոր հարթակներ, որտեղ դպրոցականները կկարողանան գտնել զանազան կրթական նյութեր, դիտել դեսադասեր, հետևել ուսուցիչների կողմից ստեղծված առարկայական բլոգների»,- նշեց «Ապահով համացանց» ծրագրի համակարգողը` հավելելով, որ Երևանի և մարզերի 100 ուսուցիչների համար անցկացվելու են բլոգների ստեղծման և Scorm ստանդարտների դասընթացներ: 

Բանախոսի պնդմամբ` ծրագիրը միտված է ոչ թե երեխաներին համացանցից ընդհանրապես կտրելուն, այլ նրանց կրթելու և իրազեկելու այն բոլոր ռիսկերի ու վտանգների մասին, որոնց հնարավոր է բախվել համացանցից օգտվելիս: 

Նրա փոխանցմամբ` միջազգային փորձը ցույց է տվել, որ տեղեկատվական տեխնոլոգիաներին տիրապետող երեխաներն ավելի հեշտությամբ են կարողանում հաղթահարել համացանցի հետ կապված տարաբնույթ ռիսկերը, նաև դիմակայել բացասական ազդեցություններին: 

«Այս նպատակով կազմակերպելու ենք նաև մասնավոր կյանքի պաշտպանության ու անվտանգության հարցերին նվիրված կրթական ծրագրեր և իրազեկման արշավներ, որոնց ընթացքում սովորեցնելու ենք, թե ինչ միջոցներով ու գործիքներով հնարավոր կլինի կանխարգելել տեխնոլոգիաների ոչ նպատակային և վնասակար օգտագործումը»,- ընդգծեց Ն. Խաչատրյանը:

Վերջինիս կարծիքով` նմանատիպ միջոցառումների շնորհիվ երեխաներն ինֆորմացիայի պասիվ սպառողից աստիճանաբար վերածվելու են բովանդակություն ստեղծողների` գիտակցաբար շրջանցելով բոլոր ռիսկերը: 

Համացանցի կառավարման միջգերատեսչական խորհրդի քարտուղար Գրիգորի Սաղյանի խոսքերով` ապահով համացանց հասկացությունը չի վերաբերում միայն երեխաներին, քանի որ մեծահասակները ևս պաշտպանված չեն: 

Նրա կարծիքով` ապահով համացանց ստեղծելու համար անհրաժեշտ է պարզապես տարանջատել տեխնիակական և բովանդակային անվտանգություն հասկացությունները:

«Տեխնիկական մասով անհրաժեշտ է կրթել տեխնիակական մասնագետների, ցանցային ադմինիստրատորների, որպեսզի վերջիններս թույլ չտան վիրուսների ներթափանցումը համակարգիչներ»,- ասաց Գ. Սաղյանը` ընդգծելով, որ սա առանձին մի ուղղություն է` առանց որի ապահով ինտերնետ հնարավոր չէ ունենալ:

Բովանդակային մասով մասնագետն առանձնացրեց բարոյական և կրիմինալ կամ հանցագործությունների հետ կապված բաղադրիչները, միաժամանակ նշելով, որ այս երկու բաղադրիչների միջև միջանկյալ դեր ունի անձնական տվյալների պաշտպանությունը:

Նրա խոսքերով` վերոնշյալ բաղադրիչներից հատկապես բարոյականի դեպքում երեխաների ճիշտ դաստիարակության և կրթության հարցում մեծ դեր ունի «Safe.am» կազմակերպությունը, որը դեռ վաղ տարիքից երեխաներին սովորեցնում է հարգել հեղինակային իրավունքը, զերծ մնալ համացանցի վատ ազդեցությունից և անծանոթների հետ շփումից, ճիշտ կերպով պահապնել անձնական տվյալները, հնարավորինս արդյունքվետ օգտագործել թվային տեխնիկայի ընձեռած հնարավորությունները: 

Մասնագետները փաստեցին, որ ապահով համացանց ունենալու հարցում պետք է ակտիվ դերակատարություն ունենան բոլոր շահագրգիռ կողմերը` պետությունը, տեղեկատվական տեխնոլոգիաների ընկերությունները, նաև կրթական հաստատությունները:

 

 

Էլիզա Զախարյան, «Նոյյան Տապան»